عوام کوں کورونا وائرس متعلق آگاہی ڈیوںڑ کیتے رضاکاراں دی ضرورت اے، ایس او پیز تے عمل درآمد کراونڑ ٹائیگر فورس دی ذمے واری اچ شامل اے، ٹائیگر فورس دے رضاکاراں کوں باقاعدہ کارڈ جاری کیتے ویسن ،تڈی دل مکاونڑ کیتے وی ٹائیگر فورس دے رضاکار کم کریسن ، کلین اینڈ گرین پاکستان مہم اچ وی رضاکار فورس اپنڑاں کردار ادا کریسی
اسلام آباد ۔ 5 جون (اے پی پی) وزیراعظم عمران خان آکھیے جو عوام کوں کورونا وائرس متعلق آگاہی ڈیوںڑ کیتے رضاکاراں دی ضرورت اے، ایس او پیز تے عمل درآمد کراونڑ ٹائیگر فورس دی ذمے واری اچ شامل اے، ٹائیگر فورس دے رضاکاراں کوں باقاعدہ کارڈ جاری کیتے ویسن۔ ٹائیگر فورس مہانگ تے ذخیرہ اندوزی روکنڑ بارے معلومات ڈیسی ،تڈی دل مکاونڑ کیتے وی ٹائیگر فورس دے رضاکار کم کریسن ، کلین اینڈ گرین پاکستان مہم اچ وی رضاکار فورس اپنڑاں کردار ادا کریسی ، پاکستان مزید لاک ڈاﺅن دا متحمل نی تھی سگدا ، کورونا پاروں ٹیکس محاصل اچ 800 ارب روپے دی کمی تھئی اے ، سابقہ حکومتاں دے قرضیں تے سود دی مد اچ 5 ہزار ارب روپے ادا کر چکیوں۔ بجٹ دی تیاری جاری اے، خرچے مزید گھٹ کرنڑیں ہوسن ۔ اے گال انہاں جمعے کوں اتھاں کورونا ٹائیگر فورس دے رضاکاراں نال خطاب کریندے ہوئیں آکھی اے ۔ ایں موقع تے وفاقی وزیر اطلاعات و نشریات سینیٹر شبلی فراز، وزیراعظم دے معاون خصوصی امور نوجوانان عثمان ڈار اتے وزیراعظم دے معاون خصوصی شہباز گل وی ایں موقع تے موجود ہن ۔ وزیراعظم آکھیے جو بئے ملکاں اچ کورونا وائرس توں بہوں ضیان تھئے لیکن پاکستان اچ پچھلے ترائے مہینے اچ افسوس نال آکھنڑ پوندے جو 1700 توں 1750 تئیں لوکاں دی موت تھئی اے اساکوں علم ہئی جو انہاں اچ ودھارا تھیسی ۔ کورونا وائرس روکنڑ کیتے اساکوں کورونا ٹائیگر فورس دے رضاکاراں دی ضرورت پوسی ، اساکوں آمدنی ودھاونڑیں ہوسی ، تعمیراتی شعبہ تے صنعتاں کھولنڑ دا مقصد وی ایہو ہئی جو لوکاں کوں روزگار ملے ، لاک ڈاﺅن دا امیر طبقے تے کوئی اثر نی تھیندا لیکن غریب محنت کش ڈیہاڑی دار تے تنخواہ دار طبقے متاثر تھئن ۔ احساس پروگرام دے تحت اساں مالی معاونت کیتی اے لیکن مستقل طور تے اے معاونت نی کیتی ونج سگدی ۔ اگر ٹائیگر فورس دے رضاکار ایس او پیزتے عمل درآمد کرویسن تاں لاک ڈاﺅن دی ضرورت نہ پوسی کاروبار وی کھلیا رہسی ۔ وزیراعظم آکھیے جو ٹائیگر فورس کوں میں خاص طور تے ڈساونڑ چاہنداں جو تساں دا ساریں توں پہلا کردار اے جو تساں ایس او پیز تے عمل درآمد کراونڑ اے ۔ایں توں علاوہ کوروناوارئس پاروں اگر کتھائیں لوک بے روزگار تھین اتے او اوکھ اچ ہن تاں انہاں دی معلومات وی ٹائیگرفورس دے رضاکار ڈیسن۔آونڑ آلے ڈینھ اچ بے روزگار تھیونڑ آلیاں کوں وی معالی تعاون ڈتا ویسی۔ایں بارے وی معلومات ٹائیگر فورس دے رضاکار ڈیسن۔عوام ہنڑ وی احتیاط کرن تاں اوکھ توں بچ سگدوں۔اللہ دا شکر اے جو پاکستان اچ کورونا نال اتنا ضیان کائنی تھیا،امریکہ اچ ہک ڈینھ اچ ڈوہزار توں ودھ بندے مرین،کوروناوائرس آلے علاقیاں کوں آندے ڈینھ اچ وی بند کرنڑاں پئے سگدے،محدودلاک ڈاﺅن سانگے رضاکارفورس کوں تربیت ڈتی ویسی۔دنیا اچ لاک ڈاﺅن پاروں غربت ودھی اے۔بھارت اچ شدید لاک ڈاﺅن پاروں غریب طبقہ پس گئے ،عالمی ادارے پاکستان دے احساس کیش پروگرام دے تحت امداد دی تعریف کریندے پئن۔ڈاکٹرز اتے طبی عملے تے کوروناپاروں بہوں دباﺅ اے۔پاکستان بئے لاک ڈاﺅن براداشت نی کرسگدا۔وزیراعظم آکھیا جو ٹائیگرفورس ٹڈی دل بارے وی انتظامیہ کوں معلومات ڈیسی،پاکستان اچ 30سالیں بعد ٹڈی دل دا حملہ تھیے،ہندوستان اتے افریقہ اچ وی ٹڈی دل نال فصلاں متاثر تھین،اے فصلاں دا ضیان کریندی اے ایں سانگے افریقہ اچ قحط پوونڑ دا خدشہ اے۔انہاں آکھیا جو مہانگ تکھے ودھدی ویندی اےجڈاں لاک ڈاﺅن تھیا تاں ٹرانسپورٹ بند تھی گئی ،کھاونڑ پیونڑ دی شہیں دے نرخ ودھنڑ شروع تھی گئے جئیں تے یوٹیلٹی اسٹورز دے ذریعے اساں پنجاہ ارب روپے دی ودھیکی سبسڈی ڈتی جئیں پاروں مہا نگ کائنی ودھی۔وزیراعظم آکھیا جو پاکستان دے بعد بئے ملک وی رضاکاراں دی رجسٹریشن شروع کر ڈتی اے ،برطانیہ اچ اڈھائی لکھ رضاکاراں رجسٹریشن کرائی جڈانجو صرف 35ہزار کم سانگے نکلیے جڈانجو پاکستان اچ ڈاہ لکھ رضاکاراں رجسٹریشن کروائی اے اتے انہاں اچوں پونڑے ڈو لکھ رضاکار اں اپنڑے کم شروع کر ڈتے۔
