عورتن کي معاشي طور تي مضبوط بڻائڻ جي لاءِ انهن کي ڪاروبار ۾ هڪ جهڙا موقعا فراهم ڪرڻا پوندا: صدر ڊاڪٽر عارف علوي

اسلام آباد – 04 – آڪٽوبر (اي پي پي) صدر ڊاڪٽر عارف علوي عورتن جي ترقي ۽ حقن جي لاءِ ڀرپور قدم کڻڻ جي ضرورت تي زور ڏيندي چيو آهي ته عورتن کي معاشي طور تي مضبوط بڻائڻ جي لاءِ انهن کي ڪاروبار ۾ هڪ جهڙا موقعا فراهم ڪرڻا پوندا، پاڪستان جي 50 سيڪڙو آبادي کي پيداواري افرادي قوت ۾ تبديل ڪرڻ جي لاءِ عورتن جي مالي شموليت اڻٽر آهي، عورتن کي انفارميشن ٽيڪنالاجي ذريعي پنهنجو ڪاروبار شروع ڪرڻ ۾ مدد ڪرڻ انهن کي بااختيار بڻائڻ جو تيز ترين رستو آهي. اهڙن خيالن جو اظهار هن ايوان صدر ۾ وومين بزنس نيٽ ورڪ جي اهتمام هيٺ ”رائيزنگ وومين 2023ع“ جي موضوع تي ٿيندڙ تقريب کي خطاب ڪندي ڪيو. صدر چيو ته عورتن کي تعليم، ملازمت ۽ سياسي شعبن ۾ برابر موقعا فراهم ڪرڻ جي ضرورت آهي ته جيئن انهن کي مرڪزي ڌارا ۾ شامل ڪاروباري ادارن ۾ مناسب جڳهه حاصل ڪرڻ ۾ مدد ملي سگهي. هن اهڙيون پاليسيون جوڙڻ تي زور ڏنو جن ۾ مددگار ادارا ماحول ۽ عورتن کي پنهنجي ڪاروبار کي اڳتي وڌائڻ جي لاءِ حوصلا افزائي جي لاءِ هراسان ڪرڻ کان پاڪ ڪم واري جڳهه شامل آهي. صدر عورتن تائين انٽر پرينيورشپ بابت معلومات کي وڌيڪ پهچ جوڳو بڻائڻ جو ذڪر ڪندي نشاندهي ڪئي ته رهنمائي جي گهٽتائي جي ڪري رڳو 5 سيڪڙو عورتن اسٽيٽ بئنڪ مان ڪاروباري قرضن جي مخصوص ڪوٽا مان فائدو کنيو. ڊاڪٽر عارف علوي گهريلو عورتن کي دنيا جي موجوده رجحانن کي پورو ڪرڻ جي لاءِ انٽرنيٽ جي استعمال سميت موجوده دور جي مهارتن جي اسڪل سيٽ فراهم ڪرڻ تي زور ڏنو. صدر عورتن جي ملڪيتي قانون تي موثر ۽ سخت عملدرآمد جي ضرورت تي زور ڏيندي چيو ته ان سان عورتن کي بااختيار ۽ معاشي طور تي مضبوط بڻائڻ ۾ مدد ملندي. صدر چيو ته اسلام 1400 سال اڳ عورتن کي انهن جا حق ڏئي انهن جي جائز مقام جو تعين ڪري ڇڏيو. عورتن کي وراثتي حقن بابت قانون تي عملدرآمد جي لاءِ معاشرتي قدرن کي بدلائڻو پوندو. صدر چيو ته اسلام ۽ ملڪي آئين عورتن جي برابر حقن کي يقيني بڻايو ۽ انهن جي صدر ترقي جي حمايت ڪئي آهي. هن ان ڳالهه تي افسوس جو اظهار ڪيو ته ملڪ ۾ عورتن کي وراثت جي حق کان محروم رکيو وڃي ٿو. صدر چيو ته عورتن کي بااختيار بڻائڻ جي ضرورت آهي ته جيئن انهن کي معاشي طور تي مستحڪم بڻايو وڃي. هن چيو ته اسان کي عورتن کي انفارميشن ٽيڪنالاجي جي استعمال ذريعي جديد ڪاروباري طريقن کي اختيار ڪرڻ جي تربيت ڏيڻ جي ضرورت آهي ته جيئن اهي پنهنجي گهرن مان ڪمائڻ ۾ مدد ڪن. هن چيو ته جيڪڏهن عورتن کي زندگي جي سمورن شعبن ۾ هڪ جهڙا موقعا فراهم ڪيا وڃن ته انهن کي هڪ پيداواري افرادي قوت ۾ تبديل ڪري سگهجي ٿو. صدر چيو ته معيشت جي مختلف شعبن خاص طور تي آءِ ٽي جي شعبن ۾ نوجوانن ۽ عورتن جي شموليت سان پاڪستان کي تيز رفتار ترقي حاصل ڪرڻ ۾ مدد ملي سگهي ٿي. هن چيو ته ملڪ کي ترقي جي راهه تي گامزن ڪرڻ جي لاءِ پنهنجي بي پناهه انساني وسيلن کي جديد ترين فني مهارتن سان ليس ڪرڻ گهرجي. پاڪستان ۾ آسٽريا جي سفير اينڊريا وڪ صنفي اڻبرابري کي ختم ڪرڻ جي ضرورت تي زور ڏنو ۽ چيو ته هڪجهڙي اجرت، مالي خواندگي ۽ قانوني تحفظ عورتن کي معاشي طور تي بااختيار بڻائڻ جي لاءِ اهم آهي. پاڪستان ۾ اٽلي جي سفير اينڊرياس فير ريز صنفي برابري جا هدف حاصل ڪرڻ ۾ پاڪستان سان اٽلي جي گڏيل عزم جو اظهار ڪيو. هن چيو ته وسيلن تائين برابر پهچ سان عورتون معاشري ۾ مثبت تبديلي آڻي سگهن ٿيون. وومين بزنس نيٽ ورڪ جي باني سام علي دادا چيو ته سندس تنظيم ڳوٺاڻي عورتن کي چئلينج مان ڪڍڻ ۽ انهن کي پنهنجي ۽ پنهنجي برادري جي زندگين ۾ بهتري آڻڻ ۾ مدد ڪري رهي آهي. هن پاڻڀرو انيشي ايٽو ۽ عورتن جي اسپورٽس گالا جو ذڪر ڪندي چيو ته اهو ڳوٺاڻي عورتن کي پاڻڀرو بڻائڻ جي لاءِ جاري پروگرام جو حصو آهي. ان کان اڳ صدر ڳوٺاڻي عورتن کي بااختيار بڻائڻ جي لاءِ نمايان ڪردار ادا ڪندڙ شخصيتن ۾ شيلڊز ورهايون. تقريب ۾ آسٽريا ۽ اٽلي جي سفيرن سميت غيرملڪي سفارتڪارن ۽ ٻين اهم شخصيتن شرڪت ڪئي.

مضمون کا ماخذ : جڑواں اسپن

متعلقہ مضامین